Медициналық қызметтердің қолжетімділігі артады — ҚР ДСМ Қарағанды облысында МӘМС енгізу бойынша пилот қорытындысы туралы 

ҚР Премьер-Министрі Асқар Маминнің төрағалығымен өткен Үкімет отырысында денсаулық сақтау министрі Елжан Біртанов міндетті әлеуметтік медициналық сақтандыруды (МӘМС) енгізу бойынша Қарағанды облысында пилоттық жобаны іске асыру барысы туралы баяндап берді. 

 

Пилоттық жоба мақсаттары

Биыл 1 қыркүйекте басталған Қарағанды облысындағы МӘМС пилоттың негізгі мақсаттары – медициналық қызметті алушылардың «сақтандырылу» статусын сәйкестендіру, тегін медициналық көмектің көлеміндегі және медициналық сақтандыру жүйесіндегі қызметтерді жеке-жеке есепке алу, 2020 жылдан бастап МӘМС жүйесін толығымен енгізу мақсатында дайындық жұмыстарын жүргізу. 

Пилотты іске асыру үшін бюджеттен қосымша 2,3 млрд теңге бөлінді, соның ішінде профилактикалық қарап-тексерумен консультациялық-диагностикалық қызметтердің қолжетімділігін жоғарылатуға 1,7 млрд теңге және медициналық оңалтуды кеңейтуге 600 млн теңгеге жуық қаражат бөлінді. 

Пилот шеңберінде 5 негізгі бағыт бойынша жобалық топтар құрылды: нормативтік-құқықтық актілерді әзірлеу, цифрландыру, медициналық қызметтерді сатып алу және оған төлем жүргізу, төлемдердің тұрақты жүргізілуін қамтамасыз ету, ақпараттық-түсіндіру жұмыстары.

«МӘМС жүйесін тиімді енгізудің негізгі мәселелерінің бірі – жүйеге ел тұрғындарының барлығын тарту. Бүгінде еліміз бойынша тұрғындардың 97%-ның әлеуметтік статусы анықталды, Қарағанды облысында – 98%. Қарағанды облысында тағы 32 мың адамның стастусын жаңарту керек. Жалпы, еліміз бойынша 593 мың адамның статусы жаңартылуы тиіс», — деді Е. Біртанов.

Бүгінде болжамды сақтандырылмаған азаматтар дербес төлеуші ретінде жүйеге қатыса алады. 

Ақпараттық жүйелердің әзірлігі бойынша, Қарағанды облысында дайындық жұмыстары толық аяқталды. Қарағанды облысында екі ақпараттық жүйе жұмыс істейді. Оның бірі ауруханалар мен емханаларға арналса, екіншісі жедел медициналық жәрдем қызметіне арналған. 

 

Пилоттық жобаны іске асырудың алғашқы нәтижелері 

«Пилот аясында Қарағанды облысында консультациялық-диагностикалық қызметтердің қолжетімділігі едәуір артты. Мысалы, компьютерлік томография қызметтерінің қолжетімділігі 78%-ға, медициналық оңалту қызметтерінің қолжетімділігі 73%-ға және консультациялық-диагностикалық көмек қызметтерінің қолжетімділігі 42%-ға ұлғайды. Жалпы, тұрғындар үшін медициналық қызметтердің қолжетімділігі артуда», — деді Е. Біртанов.

Қарағанды облысында жүргізіліп жатқан пилот көрсеткіштері бойынша нормативтік-құқықтық актілер енгізілді. Цифрландыру бойынша 100% кіріктірілді. Медициналық қызметтерді сатып алу бойынша Медициналық сақтандыру қоры бұл бағыттағы жұмыстарды аяқтауда. 1-31 желтоқсан аралығында Қор іріктеу және тегін медициналық көмектің кепілдендірілген көлемі және МӘМС пакеттері бойынша медициналық қызметтерге келісімшарт жасау рәсімдерін өткізеді. Сонымен қатар төлемдердің тұрақтылығын қамтамасыз ету жұмыстары жүргізілуде. 

Сонымен қатар тұрғындар арасында ақпараттық-түсіндіру жұмыстарын күшейту жұмыстары жүргізілуде, жыл соңына дейін жоспардың 100% орындалуы қамтамасыз етіледі. 

«Жалпы, Қарағанды облысында пилоттық жоба жоғары деңгейде жүргізілді деп айтуға болады. Елімізде МӘМС енгізуге дайындық жұмыстары жалғасуда», — деді денсаулық сақтау министрі.

Қарағанды облысының әкімі Жеңіс Қасымбек өңірде пилотты жүргізу аясында цифрлық инфрақұрылым бойынша ауқымды жұмыстар атқарылғанын атап өтті. Өңірдегі барлық медицина ұйымдары бір цифрлық алаңға бірікті және республикалық ақпараттық жүйелермен кіріктірілді. Емханаға бекітілген әрбір азамат үшін электронды денсаулық паспорты жасалды. Ауылдық елді мекендерде медицина ұйымдарын мемлекеттік-жекешелік әріптестік есебінен интернет желісіне 100% қосу жұмыстары жүргізіліп жатыр. Ж. Қасымбек Қарағанды облысының аумағында МӘМС енгізу бойынша пилотты жүргізудің алғашқы нәтижелері тұрғындар үшін сапалы әрі уақытылы медициналық көмектің басымдығын дәлелдейтіні айтты. 

 

МӘМС жаппай енгізуге дайындық 

Министрдің айтуынша, МӘМС жүйесін толыққанды енгізу үшін 2020 жылдың 1 қаңтарынан бастап келесі бағыттар бойынша жұмыстар жалғасады: 

  1. Нормативтік-құқықтық қамтамасыз ету;

  2. Өзін-өзі жұмыспен қамтыған тұрғындардың деректерін жаңарту;

  3. Төлемдер жиілігін қамтамасыз ету;

  4. Техникалық дайындық;

  5. Ақпараттық-түсіндіру жұмыстары.

МӘМС енгізілуімен 1 сақтандырылған адамға жұмсалатын шығындар 57%-ға артады. 

Бүгінгі күні МӘМС жүйесіне төлемдер екінші деңгейлі 25 банк арқылы, оның ішінде 7 интернет банкинг порталы арқылы жүзеге асырылады. 2019 жылдың 15 желтоқсанынан бастап барлық медициналық ұйымдарда өзіне-өзі қызмет көрсету терминалдары орнатылады. 

«Әлеуметтік медициналық сақтандыру қоры» КЕАҚ басқарма төрағасы Айбатыр Жұмағұлов Қордың МӘМС енгізуге әзірлігі туралы баяндай отырып, жүйенің институционалдық негіздері мен қағидаларын қалыптастыру жұмыстары 2015 жылы басталғанын атап өтті. Бүгінде медициналық қызметтердің әлеуетті жеткізушілерінің базасы жасалған. Бұл тізімге 1940 медицина ұйымы кірді. Оның ішінде 60% — жекеменшік. Сонымен қатар, Қор тегін медициналық көмек пен міндетті медициналық сақтандыру аясында 2020 жылға арналған Медициналық қызметтерді сатып алу жоспарын жасау жұмыстарын аяқтады.

Премьер-Министрдің орынбасары Б. Сапарбаев өз кезегінде міндетті әлеуметтік медициналық сақтандыруды енгізу мәселесінде жұмыс берушілердің қаражатты уақытылы аударуына ерекше көңіл бөлу керектігін айтты. 

 

МӘМС енгізуден күтілетін нәтижелер

Е. Біртанов МӘМС жүйесін енгізу кейбір медициналық қызметтердің қолжетімділігін 7 есеге арттыратынын атап өтті. 

Тарифтердің өсуі 10%-дан 20%-ға дейін құрайды. Бұл медицина қызметкерлерінің жалақысын 30%-ға арттыруға мүмкіндік береді. Медициналық техникамен жарақтандырылу деңгейі 70%-дан 73%-ға дейін артады. МӘМС енгізу қазіргі кездегі «қалта» шығындарын 2020 жылы 30%-ға, ал 2025 жылға қарай шамамен 2 есеге төмендетуге мүмкіндік береді. 

Жалпы, МӘМС енгізуге әзірліктің жоғары деңгейін атап өткен жөн. 

Қазақстанның Премьер-Министрі мен Үкіметі жаңалықтарынан хабардар болыңыз — ресми Telegram-каналға жазылыңыз

Жазылу